Ætla að vinna meira saman

Að loknum fundi með utanríkisráðherrum G8-ríkjanna ákváðu utanríkisráðherrar Afganistans og Pakistans að efla samvinnu milli ríkisstjórna landanna tveggja.

Rangin Radfar Danta, utanríkisráðherra Afgani­stans, og Khursid Kasuri, utanríkisráðherra Pakistans, sendu frá sér sameiginlega yfirlýsingu þar sem þeir sögðust ítreka vilja ríkisstjórna beggja landanna til þess að styrkja samvinnu og samskipti „á öllum sviðum, en sérstaklega þó á sviði öryggismála, málefna flóttamanna, efnahagsþróunar og aukinna samskipta milli þjóða“.

Fundurinn var haldinn í Potsdam skammt fyrir sunnan Berlín og var öryggisgæsla gífurlega mikil. Svartklæddar leyniskyttur gættu dyra ráðstefnuhússins og þyrlur sveimuðu fyrir ofan.

Leiðtogafundur G8-ríkjanna, sem er hópur stærstu iðnríkja heims, verður haldinn í Heiligen­damm í Þýskalandi dagana 6. til 8. júní næstkomandi. Utanríkisráðherrafundurinn er einn af mörgum ráðherrafundum G8-hópsins sem haldnir hafa verið til undirbúnings leiðtogafundinum.

Auk þess að ræða við utanríkisráðherra Afgani­stans og Pakistans eru meðal annars málefni Kosovo til umræðu á fundi utanríkisráðherranna, sem hafa átt erfitt með að fá Rússa til að fallast á hugmyndir Sameinuðu þjóðanna um framtíð héraðsins.