Shimon Peres býður sig fram

Shimon Peres, aðstoðar­forsætisráðherra Ísraels, greindi í gær frá því að hann ætlaði að bjóða sig fram til forseta. Ísraelsþing kýs forseta landsins hinn 13. júní næstkomandi.

Núverandi forseti, Moshe Katzav, hefur sætt alvarlegum ásökunum um nauðganir og kynferðislega áreitni gagnvart starfsfólki sínu.

Peres, sem er 83 ára, bauð sig fram til forseta fyrir sjö árum en þá varð Katzav fyrir valinu. Peres hefur verið þingmaður síðan árið 1959 og hefur gegnt ýmsum helstu valdaembættum landsins.