Rassía gerð í Sadr-hverfinu

Hundruð íraskra og bandarískra hermanna lokuðu hluta af borgarhverfinu Sadr-borg í Bagdad í gær af og gengu hús úr húsi í leit að fimm Bretum, sem var rænt úr stjórnarbyggingu skammt frá daginn áður.

Mennirnir fimm voru á þriðjudag dregnir út úr byggingu íraska fjármálaráðuneytisins af um 40 þungvopnuðum mönnum í lögreglubúningum og ekið burt í heilli lest jeppa inn í Sadr-borg, að sögn íraskra embættismanna. Háttsettur Íraki sagði Mahdi-herinn, vopnað lið sjía-klerksins Moktada al-Sadr, grunaðan um verknaðinn.