Tvö hundruð munkar handteknir í morgun

Öryggisveitir á vegum herforingjastjórnarinnar í Búrma handtóku í morgun að minnsta kosti tvö hundruð búddamunka. Fimm voru skotnir í mótmælunum þar í landi í gær.

Munkarnir voru handteknir þegar öryggisveitir ruddust inn í tvö munkaklaustur skammt frá höfuðborg Búrma, Rangún. Ekkert lát virðist vera á mótmælunum þar í landi og hefur ástandið farið versnandi.

Í gær voru fimm skotnir í átökum milli öryggisveita og mótmælanda og þá beitti lögreglan kylfum og táragasi til að brjóta upp mótmælin.

Lögreglumenn hafa girt af pagóðuna og ráðhúsið í miðborg Rangún þar sem mótmælendur hafa safnast saman.

Öryggisráð Sameinuðu þjóðanna bað yfirvöld í Búrma í gær að sýna stillingu og koma í veg fyrir ofbeldi. Fulltrúar Bandaríkjamanna í ráðinu vildu ganga lengra og beita refsiaðgerðum en Kínverjar ásamt Rússum lögðust gegn slíkum hugmyndum.