Rommendahl vill fara aftur heim

Danski landsliðsmaðurinn Dennis Rommendahl hjá Charlton virðist vera orðinn þreyttur á botnbaráttunni, því hann hefur kallað á FC Kaupmannahöfn í heimalandi sínu og skorar á menn þar á bæ að gera tilboð í sig.

Daninn hefur ekki náð sér á strik frekar en aðrir leikmenn Charlton í vetur og liðið virðist á tíðum dauðadæmt til að falla í 1. deild í vor. Rommendahl segist ekki geta hugsað sér að spila með liði utan úrvalsdeildarinnar og langar frekar að fara aftur heim til Danmerkur.

"Ef ég á að vera hreinskilinn, kom ég ekki til Englands til að spila í næstefstu deild og ég efast um að félagið nái að halda í bestu leikmennina ef það fellur í vor. Ég útiloka ekki að spila heima í Danmörku og ef FC Kaupmannahöfn hefur áhuga, ætti félagið ekki að hika við að setja sig í samband. Ég mun íhuga tilboð þeirra alvarlega, enda hafa margir danskir leikmenn náð að rétta ferilinn við eftir að þeir fóru aftur heim," sagði Rommendahl.