Erfiðast að venjast veðrinu

Ekki eru allir útlendingar í ensku úrvalsdeildinni lengi að smella inn í knattspyrnuna þar í landi og á meðan hvorki gengur né rekur hjá framherjanum Andriy Shevchenko hjá Chelsea, hefur Ítalinn Vincenzo Montella farið á kostum í fyrstu leikjum sínum með Fulham.

"Ég gat ekki gengið um göturnar í Róm í friði án þess að fólk þekkti mig, en hérna þekkir mig ekki nokkur maður. Ég er samt í mestu vandræðum með að venjast veðrinu hérna í London - það er svo hvasst hérna. Það er gott að sjá að metnaðurinn hjá Fulham er mikill og góður og stuðningsmennirnir voru farnir að syngja nafn mitt áður en ég steig inn á völlinn í fyrsta skipti," sagði Montella ánægður, en hann hefur skorað þrjú mörk á innan við viku með liðinu síðan hann kom frá Roma á dögunum.