Benjani er leikmaður helgarinnar

Framherjinn Benjani Mwaruwari hjá Portsmouth var leikmaður helgarinnar í ensku úrvalsdeildinni og varð markahæstur í deildinni þegar hann skoraði í stórsigri Portsmouth á Newcastle um helgina.

Benjani hefur ekki sloppið við gagnrýni í tíð sinni á Fratton Park, en hann hefur verið mjög iðinn við kolann fyrir framan mark andstæðinganna á þessari leiktíð. Portsmouth hefur líka náð fínum árangri og situr í 5. sæti deildarinnar með 22 stig eftir 12 leiki.

Þessi fyrrum leikmaður Auxerre var lekri vörn Newcastle sannkölluð martröð um helgina þegar lærisveinar Harry Redknapp unnu útrúlegan 4-1 sigur á St. James´Park. Þetta var fyrsti sigur Portsmouth fyrir norðan síðan árið 1949 og mark Benjani í leiknum tryggði að hann er orðinn markahæstur í ensku úrvalsdeildinni með átta mörk.

Benjani, sem kemur frá Zimbabwe, skoraði aðeins sex mörk í deildinni á síðustu leiktíð en hefur verið í milklu stuði það sem af er þessari. Hann ber gælunafnið "Big Ben" eða "Stóri-Ben" hjá félögum sínum og stóð undir því þegar hann ruddi varnarmanninum Cacapa hjá Newcastle úr vegi og skoraði markið sitt á laugardaginn.

Benjani hefur fram að þessu fyrst og fremst verið þekktur fyrir baráttugleði en á síðustu leiktíð var hann meira í því að klúðra færum en að nýta þau og spilaði m.a. 15 leiki í röð án þess að skora.

"Ég veit ekki af hverju mér gengur svona vel að skora núna. Nú er ég markahæstur og ég vona svo sannarlega að ég verði það líka þegar tímabilinu lýkur. Annars er mér sama um það ef liðið heldur áfram að vinna leiki og ganga vel," sagði hinn feimni Benjani eftir sigurinn á Newcastle, en hann átti m.a. stóran þátt í því að varnarmaðurinn Cacapa var tekinn af velli eftir innan við 20 mínútna leik hjá Newcastle.

Harry Redknapp, stjóri Portsmouth, er mjög ánægður með framherjann þó hann hafi bannað honum að taka fleiri í vítaspyrnur fyrir liðið eftir að hann klúðraði spyrnu sinni í uppbótartíma gegn West Ham um daginn - en það kostaði Portsmouth tvö dýrmæt stig.

"Ég væri að ljúga ef ég segði að ég hefði vitað að hann myndi skora öll þessi mörk. Ég hef alltaf séð hann meira sem vinnusamann framherja sem skapar færi fyrir aðra og hélt að hann þyrfti mann við hlið sér sem skoraði fleiri mörk. Hann er hinsvegar farinn að skora grimmt núna og það á hann skilið. Hann vinnur rosalega vel fyrir liðið og gefur varnarmönnum aldrei mínútu til að hvíla sig og stuðningsmenn okkar elska hann út af lífinu," sagði stjórinn.

Nafn: Benjamin "Benjani" Mwaruwari

Fæddur: 13. ágúst 1978 í Harare í Zimbabwe

Félög: Jomo Cosmos, Grashoppers (lánsmaður), Auxerre og Portsmouth.

Númer: 25