SÞ óttast hörmungar í Sómalíu vegna átaka

Sameinuðu þjóðirnar segja miklar hörmungar í uppsiglingu ef ekki verði bundinn endi á átök á milli íslamskra uppreisnarmanna í Sómalíu og hersveita Eþíópíu í landinu.

Yfir 200 þúsund manns hafa nú flúið heimili sín í höfuðborginni Mogadishu frá því í desember þegar eþíópískar hersveitir aðstoðuðu sómalska herinn að hrekja uppreisnarmenn á brott frá borginni. Stór hluti þeirra sem flúið hafa heimili sín eru konur og börn og segja hjálparstofnanir að nú séu raun aðeins eftir hermenn, uppreisnarmenn og karlmenn að verja eigur sínar í Mogadishu.

Flóttafólkið skorti bæði vatn og mat og þá hafi fjölmargir látist úr sjúkdómum. Erfitt sé að koma hjálpargögnum til fólksins vegna átakanna.