Framtíð Wolfowitz enn óráðin

Stjórn Alþjóðabankans hefur frestað því að taka endanlega ákvörðun um framtíð Pauls Wolfowitz bankastjóra sem varð uppvís að því að hafa veitt ástkonu sinni bæði stöðu- og launahækkun innan bankans.

Í yfirlýsingu frá stjórn bankans, sem send var út í morgun eftir langan fund í gærkvöld, segir að hún hafi ákveðið að ljúka málinu sem allra fyrst en enn eigi eftir að fara yfir nokkur atriði. Tillögum verði síðan skilað til framkvæmdastjórnar bankans.

Þess hefur verið krafist að Wolfowitz segi af sér þar sem hann hafi skaðað ímynd bankans og sömuleiðis gengið þvert á yfirlýsingar sínar um að uppræta spillingu í tengslum við lánveitingar frá bankanum til þróunarlanda.

Wolfowitz segist ekki munu láta af störfum og styður Bush Bandaríkjaforseti þá ákvörðun. Hann tilnefndi Wolfowitz til starfans árið 2005 eftir að Wolfowitz hafði hætt sem aðstoðarvarnarmálaráðherra Bandaríkjanna.