Terry framlengir ef Mourinho verður áfram

Jose Mourinho, knattspyrnustjóri Chelsea, staðfesti í gærkvöld að verið væri að leggja lokahönd á nýjan samning handa fyrirliðanum John Terry. Nýr samningur hans er talinn verða einhver sá stærsti í sögu úrvalsdeildarinnar, en því er haldið fram að Terry vilji aðeins framlengja ef hann fái tryggingu fyrir því að Jose Mourinho verði áfram knattspyrnustjóri Chelsea.

"Terry er nálægt því að undirrita nýjan samning og ég á von á að hann klári það á næstu dögum. Hann sagði hinsvegar að hann ætti mjög erfitt með að spila fyrir annan stjóra en mig, því hann er sammála leikstíl mínum og telur hann bestan fyrir félagið," sagði Mourinho og var þvínæst spurður hvort Terry hefði spurt hann beint út hvort hann ætlaði að vera áfram hjá Chelsea eftir næsta sumar.

"Já, hann spurði mig að því - og ég sagðist halda það," sagði Mourinho. Breskir fjölmiðlar halda því fram að Terry muni fá allt að 150 þúsund pund í vikulaun fyrir nýja saminginn.