Barcelona hefur boðið í Rossi

Umboðsmaður framherjans Giuseppe Rossi hjá Manchester United segir að Barcelona hafi fyrir nokkru gert 4,1 milljón punda tilboð í leikmanninn. Rossi er nú sem lánsmaður hjá gamla liðinu sínu Parma á Ítalíu og fór á kostum þar í sínum fyrsta leik um helgina. +

Umboðsmaðurinn segir að ítalski boltinn henti Rossi betur en sá enski og því hafi Rossi ekki viljað fara til annars ensks félags sem vildi fá hann að láni í janúar eftir að hann kláraði lánssamning sinn við Newcastle.

Sir Alex Ferguson kallaði Rossi eitt sinn "framtíð United" en eitthvað virðist hann vera orðinn minna hrifinn af framherjanum úr því hann lánar hann sífellt í burtu frá félaginu - jafnvel þó lykilframherjar hafi verið meiddir.