Talinn líkastur Hemingway

Hvítskeggjaður tryggingasölumaður frá Flórída vann keppni um hver sé líkastur nóbelsskáldinu látna, Ernest Hemingway, á árlegri hátíð í minningu rithöfundarins.

Larry Austin bar sigurorð af 122 öðrum keppendum í keppninni, sem fram fór á Sloppy Joe‘s Bar, eftirlætisknæpu Hemingways, þegar hann bjó í Flórída á fjórða áratug síðustu aldar. Lokaumferðin var haldin á laugardag en þá voru 108 ár frá fæðingu skáldsins.

Hemingway er meðal annars þekktur fyrir skáldsögur sínar „Hverjum klukkum glymur“, „Gamli maðurinn og hafið“ og „Vopnin kvödd“.