Vilja ekki sígaunana

Þúsund Róma-sígaunar koma til Ítalíu í hverjum mánuði, margir þeirra frá Rúmeníu sem gekk í Evrópusambandið um síðustu áramót.

Um sjö þúsund Róma-sígaunar hafa sest að í höfuðborginni Róm; einungis 1.500 þeirra búa í bæjar­­íbúðum en flestir þeirra eru heimilislausir og hafast við í hreysum sem þeir hafa reist sér. Enska blaðið The Guardian greindi frá þessu í vikunni.

Innflutningur sígaunanna er orðinn svo mikið vandamál að mati stjórnvalda í Róm að borgarstjórinn Walter Veltroni hefur gripið til róttækra en jafnframt umdeildra aðgerða til að stemma stigu við innflutningi þeirra.

Borgarstjórinn fór til þriggja bæja í Rúmeníu, þaðan sem meirihluti sígaunanna kemur; Craoiva, Valarasi og Turnu Severin, í lok júní til að ræða við stjórnvöld þar um hvernig hægt væri að fá sígaunana til að flytja ekki úr landi. Auk þess skrifaði borgarstjórinn undir samkomulag við stjórnvöld í Rúmeníu um samstarf við að senda sígaunana aftur heim í sérstökum tilfellum. Borgarstjórinn hefur líka sagt að stjórnvöld í Róm hyggist byggja fjórar búðir í úthverfum borgarinnar til að hýsa innflytjendurna.

Á þriðjudaginn var stuðst við samkomulag Veltronis og stjórnvalda í Rúmeníu þegar fyrsti Rúmeninn var sendur aftur til síns heima, að sögn ítalska dagblaðsins Corriera della Sera. Um var að ræða fatlaðan mann að nafni Florín B. sem hafði búið á götum Rómaborgar og betlað sér til viðurværis. „Endurkoma Flóríns B. til Rúmeníu sýnir að samkomulagið sem við skrifuðum undir við yfirvöld í Búkarest mun skila árangri. Við getum nú boðið fólki sem á í miklum erfiðleikum eftir að hafa flutt til Rómar möguleikann á að aðstoða það við að fara aftur til síns heima, sérstaklega í tilfellum þar sem um er að ræða fatlaða eða bæklaða einstaklinga sem reyna að hafa í sig og á með betli og eiga í erfiðleikum með að draga fram lífið,“ sagði Walter Veltronis í samtali við Corriera della Sera á miðvikudaginn.

Borgarstjórinn telur að aðgerðir hans muni skila árangri en talsmaður Róma-sígaunanna segir það ólíklegt að margir þeirra muni vilja fara aftur til Rúmeníu þar sem launin sem þeir geti fengið þar séu á milli 1.600 og 3.300 krónur á viku.