Deilt um brjóstagjöf á Filippseyjum

Deila um hvort mæður eigi að gefa börnum brjóst var tekin fyrir í hæstarétti Filippseyja í gær.

Heilbrigðisyfirvöld héldu því fram að ágeng auglýsingaherferð hefði haft þau áhrif að margar konur trúi því að þurrmjólk sé betri en brjóstamjólk.

Minna er nú um að konur hafi börnin sín á brjósti í Asíu og gefa einungis 35 prósent mæðra börnum sínum ekkert nema brjóstamjólk fyrstu sex mánuðina. Heilbrigðisstofnun Filippseyja ákvað því í fyrra að herða reglur um auglýsingar fyrirtækja sem framleiða þurrmjólk. Markmiðið var að gera þeim erfiðara fyrir að ná til foreldra barna undir tveggja ára aldri með auglýsingum sínum.

Samkvæmt núgildandi lögum er ólöglegt að auglýsa vörur fyrir börn sem eru yngri en eins árs.

Filippeysk heilbrigðisamtök höfðuðu mál gegn Heilbrigðisstofnun Filippseyja á þeim grundvelli að aðeins þing landsins hafi vald til að breyta reglum.

Alþjóðaheilbrigðismálastofnunin (WHO) mælir með því að mæður hafi börn á brjósti fyrstu sex mánuðina og haldi brjóstagjöf áfram meðfram fæðugjöf fram til tveggja ára aldurs.