Johnson nappaður við að stela klósettsetu

Enski landsliðsmaðurinn Glen Johnson hjá Chelsea, sem leikur nú sem lánsmaður hjá Portsmouth, var á miðvikudaginn handtekinn ásamt félaga sínum eftir að hann reyndi að stela klósettsetu og pípulagnaefni í verslun á Dartford á Englandi.

Starfsmaður verslunarinnar segir að Johnson og félagi hans hafi hlegið þegar þeir voru staðnir að verki við þjófnaðinn og hefðu ekki hætt að hlæja þó lögregla hafi verið kölluð til og handtekið þá. Báðir menn voru sektaðir fyrir uppátækið, en forráðamenn Portsmouth hafa neitað að tjá sig um þetta fáránlega atvik.

"Við þekktum Johnson strax og allir voru á einu máli um að það væri út í hött að maður með þessar himinháu tekjur tæki upp á öðru eins," sagði starfsmaður verslunarinnar. Þetta er langt frá því að vera í fyrsta sinn sem Johnson kemst í fréttirnar fyrir agavandamál og ljóst að hann á eftir að heyra nokkra brandarana um þessa uppákomu í framtíðinni.