Klesstum á múrvegg

Sir Alex Ferguson segir að Manchester United hafi klesst á múrvegg í janúarglugganum og segir það staðfesta það sem hann hafi alltaf sagt - það sé mjög erfitt að finna góða leikmenn á þessum árstíma.

Ferguson batt vonir við að krækja í þá Owen Hargreaves og Gareth Bale í janúar, en ljóst er að ekkert verður af þeim viðskiptum. "Við höfum klesst á múrvegg í augnablikinu og segi það á hverju ári - það gerist einfaldlega ekki mikið í janúar. Það er ekkert í gangi hjá okkur, Chelsea eða Arsenal og einu liðin sem hafa náð að versla eitthvað eru Portsmouth og Blackburn.

Ég talaði t.d. við Martin O´Neill hjá Aston Villa í síðustu viku og hann er í bullandi vandræðum eins og við. Það er einfaldlega mjög erfitt að ná í leikmenn í janúar," sagði Ferguson.