Öruggur sigur hægrimanna

Kjósendur í Frakklandi virtust ætla að veita Nicolas Sarkozy forseta ótvírætt umboð til að hrinda í framkvæmd efnahagsumbótaáformum sínum, með því að veita hinum hófsama hægriflokki hans, UMP, stórt forskot á keppinauta til vinstri í kosningum til þjóðþingsins í gær.

Samkvæmt spám þriggja stofnana byggðum á fyrstu tölum fékk UMP og minni bandalagsflokkar um 46 prósent atkvæða en Sósíalistaflokkurinn og aðrir vinstriflokkar á bilinu 36-37 prósent.

Kjörsókn var minni en nokkru sinni áður í þingkosningum í landinu, á bilinu 60-61 prósent. Var það helst rakið til skorts á spennu vegna þess að kjósendur áttu almennt von á að hægriflokkarnir ynnu örugglega, frá því Sarkozy vann sósíalistann Segolene Royal í úrslitaumferð forsetakosninganna fyrir mánuði. Meginspurningin var sú hversu stórt tap vinstriflokkanna yrði.

Hægrimenn eru nú í kjörstöðu fyrir síðari umferð þingkosninganna næsta sunnudag og munu sennilega geta aukið enn á meirihluta sinn í þinginu, þar sem 577 fulltrúar eiga sæti.