Taylor segist ætla að verja mál sitt sjálfur

Charles Taylor, fyrrverandi stríðsherra í Líberíu, mætti ekki í réttarsalinn þegar réttarhöld yfir honum hófust í gærmorgun hjá alþjóðlegum stríðsglæpadómstól í Haag.

Strax við upphaf réttarhaldanna tilkynnti Karim Khan, lögmaður Taylors, að hann hefði rekið sig og ætlaði að verja sig sjálfur. Síðan gekk Khan út úr réttarsalnum, þrátt fyrir að dómarinn hafi þrábeðið hann um að sitja áfram og verja Taylor, að minnsta kosti þennan fyrsta dag réttarhaldanna.

Í yfirlýsingu frá Taylor, sem Khan las upp, segist Taylor sannfærður um að hann muni ekki fá sanngjarna málsmeðferð.

„Þetta er engin varnarbrella,“ sagði Khan við fréttamann AP fréttastofunnar fyrir utan réttarsalinn. Khan segir Taylor hafa litið svo á að réttarhöldin myndu leiða beint til sakfellingar, „og við þær kringumstæður nýtti hann rétt sinn til að víkja mér úr starfi og verja sig sjálfur.“Dómarinn ákvað engu að síður að réttarhöldin myndu halda áfram. Stephen Rapp, aðalsaksóknari í málinu, hóf þá málflutning sinn og lýsti þeim hryllingi sem þorpsbúar í Líberí máttu þola af hendi hersveita, sem sagðar hafa verið undir stjórn Taylors.

Rapp segir að hersveitirnar hafi myrt fólk af handahófi og hneppt aðra í þrældóm til að nota ýmist sem hermenn, námuverkamenn eða við landbúnaðarstörf. Rapp segir árásarmennina hafa „limlest fólk, skorið af því hendur og útlimi, stungið í augu. Börn voru þvinguð til þess að drepa foreldra sína.“

Taylor er ákærður fyrir stríðsglæpi og glæpi gegn mannkyni og er ákæran í ellefu liðum. Ákærurnar lúta allar að voðaverkum hersveita Taylors, sem framin voru í nágrannaríkinu Sierra Leone á árunum 1991 til 2002, þegar þar ríkti borgarastyrjöld. Líklegt þykir að Taylor muni síðar þurfa að svara til saka fyrir sams konar glæpi stríðsmanna sinna í Líberíu.

Réttarhöldunum verður haldið áfram þann 25. júní næstkomandi og er reiknað með að þau standi í hálft annað ár.