Máli Kanadamanns vísað frá

Peter Brownback, dómari við einn af herdómstólum Bandríkjahers yfir föngunum, sem eru í haldi í Guantanamo á Kúbu, vísaði í gær frá dómi máli eina Kanadamannsins sem þar er í haldi.

Fanginn, sem heitir Omar Khadr, var handtekinn í Afganistan árið 2002, þá aðeins 15 ára gamall, og sakaður um að hafa drepið bandarískan hermann í átökum með því að kasta handsprengju.

Brownback dómari sagði málið ekki falla undir lögsögu sérdómstólanna í Guantanamo, vegna þess að Khadr hefur ekki verið úrskurðaður „ólögmætur óvinveittur bardagamaður“. Sérstök úrskurðarnefnd komst að þeirri niðurstöðu að Khadr væri „óvinveittur bardagamaður“ en samkvæmt bandarískum lögum eiga dómstólarnir í Guantanamo einungis að fjalla um mál „ólöglegra“ bardagamanna úr óvinaliði.

Dómarinn útilokaði ekki að mál Khadrs gæti komið fyrir dómara síðar, verði þá búið að breyta skilgreiningunni á því hvers konar fangi Khadr er.

Yfirmaður þeirra lögfræðinga, sem sjá um vörn fanganna á Kúbu, sagði í gær að frávísun málsins frá dómi væri afar mikilvæg og gæti haft mikil áhrif, því enginn fanganna þar hefur til þessa verið skilgreindur sem „ólöglegur“ bardagamaður.