Erfiðir dagar öryggisáætlunnar

Yfirhershöfðingi Bandaríkjanna í Írak segir nýja öryggisáætlun hafa átt erfiða daga en er sannfærður um að hægt sé að fækka árásum uppreisnarmanna. Hershöfðinginn, David Petraeus hélt í dag sinn fyrsta fréttamannafund síðan hann tók við yfirstjórn heraflans í síðasta mánuði.

Hann viðurkenndi að árásir hafa orðið hundruðum Íraka að bana síðan ný öryggisáætlun tók gildi en sagðist þó greina jákvæða þróun. Robert Gates varnarmálaráðherra Bandaríkjanna samþykkti í gær að senda 2.200 herlögreglumenn til viðbótar til Írak til að aðstoða við öryggisáætlunina.

Patraeus sagði það nauðsynlegt að taka aukið ofbeldi og skærur á milli síja og súnnía föstum tökum enda skipti átökin íröksku þjóðinni í tvær andstæðar fylkingar. „Það er of snemmt að greina skýr merki en við höfum þó séð stöku jákvæð merki", sagði Patraeus um öryggisáætlunina.