Írakar óska skuldaeftirgjafar

Á tveggja daga alþjóðlegri ráðstefnu sem haldin er í Egyptalandi og ætlað er að safna hugmyndum, fé og öðrum stuðningi við stöðugleika og uppbyggingu í Írak, átti Condoleezza Rice, utanríkisráðherra Bandaríkjanna, viðræður við starfsbróður sinn frá Sýrlandi og var það fyrsti fundur háttsettra fulltrúa landanna tveggja um árabil.

Nouri al-Maliki, forsætisráðherra Íraks, hvatti í opnunar-ávarpi ráðstefnunnar til þess að ríkisstjórnir landa heims íhugi alvarlega að gefa Írak eftir erlendar skuldir sínar. Þær nema á að giska því sem svarar 3.200 milljörðum króna. Nú þegar hefur svonefndur Parísarklúbbur lánardrottna gefið Írökum eftir skuldir að upphæð um 100 milljarða bandaríkjadala, andvirði um 6.400 milljarða króna.

Eitt af markmiðum ráðstefnunnar er að koma á betri tengslum milli Íraksstjórnar, sem sjía-múslimar fara fyrir, og stjórnvalda í arabalöndunum, þar sem súnní-múslimar ráða öllu. Auk skuldaeftirgjafar vill Íraksstjórn að stjórnvöld í arabalöndunum beiti sér til að stemma stigu við straumi erlendra bardagamanna til Íraks, en þeir eru fjölmennir í hópi uppreisnarmanna þar. Um þetta síðasta atriði snerist fundur Rice með sýrlenska utanríkisráðherranum Walid al-Moallem.