Jeltsín látinn

Boris Jeltsín, fyrrverandi Rússlandsforseti, var 76 ára þegar hann lést í Moskvu í gær af völdum hjartaáfalls.

Jeltsín var forseti landsins á miklum umbrotatímum. Hann átti stóran þátt í að flýta fyrir hruni Sovétríkjanna, kom á lítt heftu markaðskerfi í framhaldi af kerfis­umbótum Mikhaíls Gorbatsjovs en steypti þjóðinni um leið ofan í djúpa efnahagskreppu sem erfitt hefur reynst að sigla upp úr.

Hann ávann sér framan af bæði vinsælda og nokkurrar virðingar fyrir að standa uppi í hárinu á kerfiskörlunum sem héldu um valdataumana í Moskvu, en þótti undir lokin orðinn hálf hjákátlegur valdafíkill sem gerði fátt til að koma í veg fyrir alvarlegan glundroða í samfélaginu. Glundroða sem bitnaði illa á almenningi en auðkýfingar og glæpasamtök áttu auðvelt með að nýta sér í hag.

Hann þótti litríkur persónuleiki og þjóðarleiðtogar á Vesturlöndum, sem áttu við hann töluverð samskipti, lofuðu hann margir hverjir í hástert og kölluðu hann vin sinn.

„Hann var stórmerkilegur maður sem sá þörfina fyrir lýðræðislegar og efnahagslegar umbætur og, með því að verja þær, gegndi hann lykilhlutverki á úrslitatímum í sögu Rússlands,“ sagði Tony Blair, forsætisráðherra Bretlands, í gær.

Carl Bildt, utanríkisráðherra Svíþjóðar, segir hann hafa verið „einn af merkustu mönnum okkar tíma“.