Umdeildur stórsigur stjórnarflokksins

Forsetaframbjóðandi stjórnarflokks Nígeríu var í gær lýstur sigurvegari umdeildra kosninga sem fram fóru á laugardaginn. Alþjóðlegir kosningaeftirlitsfulltrúar hafa harðlega gagnrýnt framkvæmd kosninganna og stjórnarandstæðingar krafist þess að þær verði ógildar.

Múslíminn Umaru Yar"Adua, ríkisstjóri Katsina og flokksbróðir fráfarandi forseta, Olusegun Obasanjo, í Lýðræðisflokki fólksins, er sagður hafa unnið stórsigur með 24,6 milljón atkvæða, þrisvar sinnum meira en næsti frambjóðandi.

Stuttu áður en úrslitin voru kynnt ávarpaði Obasanjo þjóðina þar sem hann sakaði stjórnarandstæðinga um að „blása í glæður haturs“. Obasanjo viðurkenndi að gallar hefðu verið á framkvæmd kosninganna en sagði Nígeríumenn engu að síður hliðholla lýðræðinu. Benti hann fólki á að snúa sér til dómstóla með gremjuefni sín. Annar tveggja stærstu stjórnarandstöðuflokkanna hefur þegar lýst yfir að hann muni kæra úrslitin.

Kosningarnar eru sögulegar fyrir þær sakir að í fyrsta skipti í sögu landsins á lýðræðislega kjörinn forseti að taka við af lýðræðis-kjörnum forseta. Frá því að Nígería fékk sjálfstæði frá Bretlandi árið 1960 hafa valdarán eða ógilding kosninga komið í veg fyrir það.

Verð á hráolíu hækkaði í gær en Nígería er stærsti olíuframleiðandi í Afríku og áttundi stærsti í heiminum.