Spiluðum Rocky-lögin fyrir og eftir leik

Áhorfendur og leikmenn Everton og Reading fengu óvænta heimsókn um liðna helgi er bandaríski stórleikarinn Sylvester Stallone var meðal áhorfenda. Fyrir leikinn gekk hann út á miðjan völlinn með Everton-trefil á lofti og fékk gríðarlega góðar viðtökur frá stuðningsmönnum liðsins.

Hann sagði að eftir þetta hefði hann gerst stuðningsmaður Everton enda fagnaði hann gífurlega jöfnunarmarki Andy Johnson seint í leiknum.

Ívar Ingimarsson er annar tveggja Íslendinga sem leika með Reading og spilaði hann allan leikinn. Hann segir að heimsókn Stallone hafi verið skemmtileg viðbót við leikinn. „Ég fékk þó ekki að hitta kallinn, því miður,“ sagði Ívar við Fréttablaðið.

„Þetta var ekkert smáræðismál og mikið umstang í kringum komu hans á völlinn. Við tókum þátt í þessu og spiluðum öll Rocky-lögin í búningsklefanum okkar bæði fyrir og eftir leik. Það var mikil stemmning hjá okkur.“

Ívar játar því að hafa horft á bæði Rocky- og Rambómyndirnar í æsku og hrifist með eins og allir stráklingar. „Ég held að allir hafi einhverntímann hlaupið upp nokkrar tröppur og fagnað ógurlega. Það var líka gaman að því að markmannsþjálfarinn okkar er nokkuð líkur honum og fékk óspart að kenna á því í kjölfarið.“

Stallone var staddur í Englandi til að kynna nýjustu Rocky-myndina, sem er sú sjötta í röðinni. Hún er væntanleg í íslensk kvikmyndahús í næsta mánuði.

„Ég er nú ekki búinn að sjá myndina enn en á eflaust eftir að skella mér á hana eftir þessa upplifun,“ sagði Ívar og hló.

Reading siglir annars lygnan sjó í ensku úrvalsdeildinni og er í níunda sæti með 31 stig eftir 23 umferðir.

„Það er vonandi að við höldum áfram á þessari braut,“ sagði Ívar. „Markmiðið var alltaf að ná fjörutíu stigum og ég efast ekki um að það sé stutt í að við náum því.“