Sótt að síðasta vígi skæruliða

Síðasta vígi skæruliða íslamista var við það að falla eftir umsátur hermanna sómölsku bráðabirgðastjórnarinnar og Eþíópíuhers, að því er sómalski varnarmálaráðherrann greindi frá í gær.

Umsátursherinn hefur undanfarna daga sótt hart að þeim 500-600 skæruliðum sem vörðust í bækistöð sinni, Ras Kamboni, syðst í landinu, nærri ströndinni og landamærunum að Kenía. Flótti var útilokaður þar sem Keníaher lokaði landamærunum og undan ströndinni var sérsveit bandaríska flotans á vakt.

Abdullahi Yusuf Ahmed, forseti Sómalíu, kom í gær til höfuðborgarinnar Mógadisjú í fyrsta sinn frá því að borgarastríðið hófst fyrir sextán árum.