Fimmtán á reki í níu daga

Fimmtán manns var bjargað í gær skammt frá eyjunni Jövu eftir að hafa dvalið í björgunarbát í níu daga frá því að indónesísk ferja sem fólkið var á sökk með meira en 600 manns innanborðs. Einn þeirra lést stuttu eftir björgun um borð í flutningaskipið.

Með því að veifa í ofboði og blása í neyðarflautur náði fólkið athygli skipverja á nálægu flutningaskipi. Hafði björgunarbátinn þá rekið næstum 600 kílómetra frá staðnum þar sem ferjan sökk í óveðri.

Um 245 manns hafa fundist á lífi eftir slysið og er 400 enn saknað. Aðeins 13 lík hafa fundist.