Víkingagrafir frá níundu öld

Norskir fornleifafræðingar hafa fundið grafir frá níundu öld á Fröyland á Rogalandi, sem reyndust geyma mjög marga merka muni heldra fólks frá víkingaöld.

Í einni gröfinni, sem kona lá í, fundust skartgripir, perlur, skæri, hnífur, sigð og önnur búsáhöld. Bæði konan og karlmaðurinn, sem lá í næstu gröf, voru jarðsett í 6-7 metra löngum bátum. Eftir er að rannsaka barnshaug og fleiri grafir á svæðinu, að því er Stavanger Aftenblad greinir frá.

Yfir 50 munir hafa nú þegar verið fluttir á fornleifasafnið í Stafangri til meðhöndlunar og frekari rannsókna.