Árlegt nektarhlaup við Háskóla Filippseyja í dag

Stúdentar við Háskóla Filippseyja í Maníla söfnuðust saman í morgun til að berja nakta skólafélaga augum en liðlega þrjátíu manns tóku þátt í árlegu nektarhlaupi skólans um háskólasvæðið. Það er bræðralag í skólanum sem stendur fyrir hlaupinu og þar getur hver sem er verið með en í þetta sinn voru það einungis skólapiltar sem hlupu naktir.

Stúdentarnir notuðu jafnframt tækifærið til að mótmæla hækkun skólagjalda og áformum filippseyska þingsins um að breyta stjórnarskránni. Fjölmargar stúdínur nýttu sér hlaupið og tóku myndir af skólabræðrum sínum á adamsklæðunum eins og þessi mynd ber með sér.