Kennaraverkfall í minnst 57 dönskum framhaldsskólum

Danskir framhaldsskólanemar geta nú margir setið heima og horft í gaupnir sér þar sem kennsla liggur víða niðri vegna kennaramótmæla. Að minnsta kosti 57 framhaldsskólar eru tómir í dag, að sögn danska ríkisútvarpsins. Baráttan er um peninga, kennararnir segjast ekki fullvissir um að kosningaloforð verði efnd.

Þetta er þó ekki hrein og klár launabarátta, heldur fyrst og fremst barátta fyrir auknu fjármagni í framhaldsskólastigið í heild sinni.

Búist er við að kennarar gangi út í fleiri skólum eftir því sem líður á daginn. Hægt er að fylgjast með því hvaða skólar eru lokaðir á síðu sem kennarar í Frederiksberg halda úti. Nemendur fara ekki varhluta af fjörinu, sums staðar taka þeir einnig þátt með setuverkföllum.

Töluvert ber í milli samninganefndar framhaldsskólakennara og menntamálaráðherra. Kennararnir fara fram á að rúmum 4 milljörðum íslenskra króna til viðbótar verði varið í framhaldsskólastigið en síðasta boð Bertels Haarder, menntamálaráðherra hljóðaði upp á 2,4 milljarða króna.

Fulltrúi kennara fundar á ný með ráðherranum í dag.