Stjórnarkreppan í Líbanon versnar enn

Stjórnarkreppan í Líbanon fer hríðversnandi þar sem sjötti ráðherrann hefur ákveðið að segja af sér embætti. Forseti landsins, Emile Lahoud lýsti því yfir í gær að ríkisstjórnin samræmdist ekki lengur stjórnarskrá eftir að fimm ráðherrar sögðu af sér embætti á laugardaginn. Yfirlýsing forsetans hefur ekkert lagalegt gildi eða afleiðingar en er sterk vantraustsyfirlýsing engu að síður.

Í þetta skiptið er það umhverfisráðherrann, Yacoub Sarraf, sem segir af sér en hann er dyggur stuðningsmaður Sýrlendinga.

Allir fimm ráðherrar sjíamúslima sögðu af sér á laugardaginn, þeirra á meðal tveir ráðherrar Hisbollah. Stjórnarskrá Líbanons tilgreinir að allir trúarhópar í landinu skuli eiga fulltrúa í ríkisstjórninni og sjíamúslimar eru einn fjölmennasti trúarhópurinn í landinu.