Fjörutíu grindhvölum bjargað á Nýja-Sjálandi

Fjörutíu grindhvölum var komið aftur á flot en aðrir 37 drápust eftir að hópur grindhvala synti upp á ströndina við Whangarei á norðanverðu Nýja-Sjálandi. 85 sjálfboðaliðar og opinberir starfsmenn biðu í viðbragðsstöðu meðan hópurinn synti út á ný þar sem hvalirnir hafa tilhneigingu til þess að leita aftur upp á ströndina eftir að hafa verið bjargað.

Fylgst var með hvölunum úr flugvél til þess að sjá hvert hópurinn stefndi. Síðast þegar sást til hans var hann á leið í átt að opnu hafi á ný. Dráttarvélar drógu dauðu hvalina upp á ströndina þegar búið var að koma hinum út sem enn tórðu. Ekki hefur verið ákveðið hvað verður gert við skrokkana en þeir eru yfirleitt grafnir nærri ströndinni.

Ekki er vitað hvers vegna hvalir hafa tilhneigingu til þess að synda upp á sandstrendur, jafnvel ítrekað eftir að hafa verið bjargað á flot aftur, en margar tilgátur hafa verið settar fram.