Efaðist um réttmæti innrásar

Nýlátinn fyrrverandi forseti Bandaríkjanna, Gerald R. Ford, efaðist mjög um réttmæti ákvörðunar George W. Bush, núverandi forseta Bandaríkjanna, um innrásina í Írak.

Þetta kom fram í leynilegu viðtali sem blaðamaður Washington Post tók við Ford með því skilyrði að viðtalið yrði ekki birt fyrr en eftir fráfall Fords. Viðtalið, sem tekið var í júlí 2004, var birt í gær, en Ford lést á þriðjudaginn.

Ford sagðist vera afar mótfallinn stefnu Bush í Íraksmálum.

„Ég held ekki að ég hefði farið í stríð,“ sagði Ford og bætti við að betra hefði verið að leita friðsamlegra lausna á málunum þar.