Búist við óeirðum eftir aftöku

Bandaríska herliðið í Írak býr sig undir óeirðir í kjölfar aftöku Saddams Hussein fyrrverandi Íraksforseta. Saddam hefur verið fangi Bandaríkjamanna síðan hann var handtekinn í desember 2004 en í gær var hann afhentur íröskum stjórnvöldum.

Á þriðjudaginn staðfesti áfrýjunardómstóll dauðadóminn yfir Saddam og í gær sögðu írösk stjórnvöld að engar tafir yrðu á fullnustu dómsins. Bandaríkjamenn reiknuðu með að hann yrði í síðasta lagi tekinn af lífi í dag.

Svo virðist sem allt kapp sé lagt á að Saddam verði líflátinn áður en þriggja daga fórnarhátíð múslima hefst á morgun, en í vikunni sendi Saddam frá sér bréf þar sem hann sagðist fúslega fórna sér fyrir Írak.

Hálfbræður Saddams Hussein heimsóttu hann í fangelsið í gær og hann afhenti þeim erfðaskrá sína. Þá sögðust lögfræðingar Saddams hafa fengið beiðni frá Bandaríkjamönnum um að ná í persónulegar eigur hans í fangelsið.

Dauðadóminn hlaut Saddam vegna morða á 148 sjíum í borginni Dujail árið 1982. Auk Saddams er búist við að hálfbróðir hans, Barzan Ibrahim, verði tekinn af lífi, en hann var yfirmaður leyniþjónustunnar þegar fjöldamorðin voru framin.