Hafnarlögreglan sleppir ungmennum

Lögregluyfirvöld í Kaupmannahöfn sögðust í gær hafa látið aftur lausa 186 mótmælendur, sem handteknir voru aðfaranótt sunnudagsins í götuóeirðum á Nørrebro, sem bárust síðan víðar um borgina.

„Þetta eru allt danskir ríkisborgarar,“ sagði talsmaður lögreglunnar í Kaupmannahöfn, Flemming Steen Munch. Þar að auki eru í haldi 84 útlendingar, þar á meðal 27 Svíar, 26 Norðmenn, 20 Þjóðverjar, fimm Hollendingar, tveir Finnar, tveir Írar, einn Rússi og einn Bandaríkjamaður.

Munch sagði þá myndu verða látna lausa í dag eða á morgun, þriðjudag.

Til átaka kom á laugardagskvöld er mótmælaganga ungmenna gegn því að svonefnt Æskulýðshús við Jagtvej á Nørrebro yrði rifið snerust upp í heiftarleg átök við lögreglu. Ekki hafði verið veitt leyfi fyrir göngunni og mótmælendur létu götusteinum, málningu og heimatilbúnum sprengjum rigna yfir lögregluna, sem svaraði með táragasi, kylfum og þrýstivatni.

Eitt ungmennið missti fjóra fingur er heimatilbúin sprengja sprakk í hendi þess. Einn lögreglumaður er alvarlega slasaður, með höfuðáverka eftir grjótkast. Rúður voru brotnar í verslunum og fleiri spellvirki unnin, þar á meðal á McDonalds, útibúi Danske Bank og hverfislögreglustöð Nørrebro, að sögn fréttavefs Nyhedsavisen.

Borgaryfirvöld heimiluðu ungu hústökufólki afnot af byggingunni árið 1982, en árið 2001 var hún seld til kristins félags sem síðan hefur reynt að fá unga fólkið borið út. Síðastliðinn fimmtudag var haldin friðsamleg kröfuganga þar sem borgarstjórnin var hvött til að grípa inn í og ógilda úrskurðinn um útburð. Áfrýjun hústökumanna á úrskurðinum var hafnað í Eystri landsrétti í lok ágústmánaðar síðastliðins.

„Við gefumst aldrei upp,“ hrópaði hústökufólkið lambhúshettuklætt út um glugga á byggingunni á skyndilega boðuðum blaðamannafundi í gær, að sögn fréttavefs Politiken.