Stundum má drepa án dóms

Hæstiréttur Ísraels kvað í gær upp úrskurð, sem beðið hefur verið árum saman, um fyrir fram ákveðin dráp á óvinveittum Palestínumönnum. Dómstóllinn komst að þeirri niðurstöðu að samkvæmt alþjóðalögum væri stundum heimilt að fremja slík dráp, en ísraelski herinn hefur stundað slíkt árum saman.

Dómstóllinn sagði að hvert tilvik þyrfti að vega og meta áður en kveðið væri upp úr með hvort það samræmdist alþjóðalögum eða ekki.

Ísraelski herinn hóf að beita þessari aðferð, að drepa markvisst Palestínumenn sem grunaðir eru um að skipuleggja hryðjuverk, fljótlega eftir að slitnaði upp úr friðarviðræðum og Palestínumenn hófu uppreisnar-aðgerðir haustið 2000.

Ísraelsku mannréttindasamtökin B‘tselem telja að ísraelski herinn hafi orðið 339 Palestínumönnum að bana með þessum hætti. Þar af hafi 210 verið skotmörk hermannanna en hinir hafi látið lífið vegna þess að þeir hafi verið nærstaddir þegar árásirnar voru gerðar.

Oftast eru árásir á mennina gerðar úr lofti, ýmist úr vopnuðum þyrlum eða ómönnuðum smáflugvélum, og er þá flugskeytum skotið úr þeim á bifreiðar á jörðu niðri. Oftast er byggt á upplýsingum frá leyniþjónustumönnum eða uppljóstrurum um ferðir hinna óvinveittu Palestínumanna.

Bandaríski herinn hefur beitt sams konar aðferðum í Afganistan og Írak.

Alræmdasta aðgerðin af þessu tagi var þegar sprengju var varpað á Salah Shehadeh í júlí árið 2002. Hann var háttsettur í Hamas, sagður skipuleggja sjálfsmorðssprengingar, en fyrir árásinni urðu einnig lífvörður hans og þrettán manns að auki, þar af níu börn sem öll týndu lífi. Þessi árás varð til þess að alþjóðleg mannréttindasamtök kröfðust þess að ísraelskir hermenn yrðu dregnir fyrir dóm.