Sakar þingmenn um firringu

Þótt Tony Blair, forsætis­ráðherra Bretlands, þurfi ekki að segja af sér í kjölfar þess að neðri deild þingsins felldi lagafrumvarp um hryðjuverkavarnir í fyrrakvöld hefur staða hans veikst verulega. Blair sakar þingmenn um að skilja ekki alvöru málsins.

Ákvörðun þingsins á miðvikudagskvöldið hefur valdið talsverðu uppnámi enda hefur stjórnarfrumvarp aldrei áður verið fellt í forsætisráðherratíð Blairs. 49 þingmenn Verkamannaflokksins snerust á sveif með stjórnarandstöðunni og greiddu atkvæði gegn því að lögregla gæti haldið grunuðum hermdarverkamönnum í allt að níutíu daga án þess að birta þeim ákæru. Í staðinn var breytingatillaga samþykkt þar sem heimilað var að lengja gæsluvarðhald úr fjórtán dögum í 28.

Þrátt fyrir að meirihluti neðri deildarinnar hafi snúist gegn forsætisráðherranum í málinu ætlar Blair ekki að segja af sér vegna þess. Michael Howard, leiðtogi íhaldsmanna, hvatti hann strax til að láta af embætti en viðurkenndi þó að Blair tækist að öllum líkindum að verjast vantrausti yrði slík tillaga borin upp á þinginu.

Charles Clarke innanríkisráðherra kom Blair hins vegar til varnar í viðtali við BBC í gær og sagðist þess fullviss að forsætisráðherrann héldi trúnaði stjórnarþingmannanna út kjörtíma­bilið. Orð Clarkes virðast ósk­­hyggja því nokkrir þingmenn Verkamannaflokksins lýstu því yfir í gær að þeir hygðust kjósa gegn tillögum stjórnarinnar í mennta- og heilbrigðismálum sem boðaðar hafa verið. Einn þeirra, Paul Farrelly, sagði að sýndi Blair sama stjórnunarstíl þegar þingið fjallaði um þær "myndi fjandinn verða laus".

Ríkisstjórnin hittist á fundi í gær en þar sagði Blair hluta þingmanna ekki skynja hryðjuverkahættuna og þeir væru úr tengslum við almenning. Talsmaður forsætisráðherrans sagði Blair hafa hitt yfirmenn lögreglu í gær og þeir hefðu ítrekað nauðsyn þess að geta haldið grunuðum misindismönnum í drjúgan tíma. Því væri forsætisráðherrann enn sannfærðari en áður um að rétt hefði verið að knýja málið fram.

Bresku blöðin fjölluðu ítarlega um málið í gær. Daily Tele­graph sagði daginn þann svartasta sem Blair hefði upplifað en slúðurblaðið The Sun kallaði þá sem greiddu atkvæði gegn frumvarpinu svikara.