Heimasíðan HappyNews.com nýtur vaxandi vinsælda í Bandaríkjunum um þessar mundir. Á tímum þegar hryðjuverkamenn og ýmiss konar stríðsrekstur, þar á meðal í Írak, er áberandi í daglegum fréttum þar í landi vill sífellt fleira fólk heyra glaðlegri fréttir sem fær það til að gleyma öllum hörmungunum sem eiga sér stað allt í kringum það.
"Hvað eru fréttir?" spyr Byron Reese, stofnandi heimasíðunnar. "Fréttir eiga að gefa þér mynd af heiminum eins og hann er. Fréttamiðillinn, eins og hann hefur þróast, gefur mjög brenglaða mynd af heiminum með því að ýkja slæmu fréttirnar, þjáningarnar og eymdina. Við erum að reyna að koma á jafnvægi í þessum fréttaflutningi," segir glaðlyndi Bandaríkjamaðurinn Byron.
