Forðast óþarfa hræðsluáróður

Ríkisstjórnir og fjölmiðlar verða að vara sig á spám um yfirvofandi fuglaflensufaraldur því alls er enn óvíst hvort að faraldur brjótist út. Þetta segja alþjóðlegu ferðamálasamtökin sem óttast mikinn samdrátt á næstunni.  Samtökin segja að ekki eigi að hindra fólk að ferðast nema góð ástæða sé fyrir því. Samtökin segja óþarfa hræðsluáróður geta valdið skyndilegum samdrætti í ferðamennsku sem myndi hafa gríðarleg áhrif á efnahag fjölda landa, sér í lagi þróunarlönd. Í tilkynningu frá félaginu segir einnig að ríkisstjórnir og fjölmiðlar eigi fjalla á ábyrgan hátt um flensuna til að koma í veg fyrir ótta í líkingu við þann sem varð af völdum heilkenna alvarlegra og bráðrar lungabólgu, sem fyrst kom upp í Asíu árið 2003. Stjórnvöld í Rússlandi hafa tilkynnt að fuglaflensa hafi nú breiðst út í landinu í vestur, um 220 kílómetra sunnan við Moskvu. Stjórnvöld um alla Evrópu hafa gripið til varúðarráðstafana og hafa þýsk stjórnvöld til að mynda fyrirskipað að alifuglum um gjörvallt Þýskaland verði haldið í búrum sínum til að freista þess að koma í veg fyrir að alifuglar smitist af fuglaflensu sem farfuglar kunni að bera með sér. Þá hefur framkvæmdastjórn ESB fært út bann við innflutningi fugla og fiðurs frá þeim héruðum Rússlands þar sem fuglaflensa hefur greinst. Alls hafa 60 manns látist af völdum veirunnar síðan hún greindist fyrst fyrir átta árume en af Evrópulöndum hefur hún greinst í Rúmeníu, Tyrklandi, Rússlandi.