Gerólíkur öðrum krókódílum

Vísindamenn hafa fundið hauskúpu af sjávarkrókódíl sem svamlaði um heimsins höf fyrir 135 milljónum ára.

Fjölþjóðlegur hópur vísindamanna kynnti rannsóknir sínar á hauskúpunni í fyrradag í vef­útgáfu tímaritsins Science en tæp tíu ár eru síðan kúpan fannst á fornum sjávarbotni í Argentínu. Hún er talin vera af tæplega fjögurra metra langri risaeðlu sem var uppi á júratímabilinu. Beinaleifar benda til að hún hafi haft fjórar sundblöðkur og sporð.

"Þetta dýr var að líkindum það síðasta af sinni ætt og án efa það furðulegasta í hópi sjávarkrókó­díla," sagði Diego Pol, einn vísindamannanna, í samtali við AP-fréttastofuna. Það eru orð að sönnu því trjóna dýrsins er mun styttri en sú sem krókódílar ­skarta yfirleitt og tennurnar eru stórar og sagarlaga.

Af því draga vísindamennirnir þá ályktun að aðalfæða Godzilla, eins og þeir eru þegar farnir að kalla kvikindið sem á latínu nefnist Dakosaurus andiniensis, hafi verið stórar sjávarskepnur. Af þeim var nóg í höfunum á þessum tíma eins og hinar 22 metra löngu hvaleðlur eru dæmi um. Ekki er þó talið að Godzilla hafi getað lagt sér slíkar ófreskjur til munns, þrátt fyrir sagar­tennurnar ógurlegu.