Össu sleppt í Grafningi

Össu sem dvalið hefur í Húsdýragarðinum var sleppt í dag austur í Grafningi þar sem hún fannst særð snemma í janúar. Fuglinn sem fékk viðurnefnið Erna í garðinum hafði flogið á raflínu og farið úr lið á vinstri væng en gert var að sárum hennar og henni leyft að jafna sig í garðinum.

Fundaði með Norður-Kóreumönnum

Fulltrúi Kínverja átti í dag fund með yfirvöldum í Norður-Kóreu til þess að reyna að fá þau til að hefja aftur viðræður um kjarnorkuvopnáætlun sína. Norður-Kóreumenn drógu sig út úr viðræðum sex ríkja um kjarnorkumál í Norður-Kóreu og lýstu um leið yfir að þeir ættu kjarnorkuvopn.

Alda sjálfsmorðsárása á hátíð

Alda sjálfsmorðsárása hélt áfram í Írak í dag um leið og ein mikilvægasta trúarhátíð sjíta náði hámarki. Tilraunir til að forðast blóðbað á hátíðinni hafa mistekist.

Minna á loforð um gervigrasvöll

Seltirningar eru orðnir þreyttir á að bíða eftir gervigrasvelli. Þeir söfnuðust saman á Hrólfsskálamel eftir hvatningu frá íþróttafélaginu Gróttu til að reka á eftir að gerður yrði gervigrasvöllur á svæðinu. Fjölmargir mættu og mynduðu hring á melnum til að sýna hvar framtíðaræfingasvæði íþróttakappa á Seltjarnarnesi á að vera.

Draugar á Þjóðminjasafni

Um níu hundruð gestir hlýddu á frásögn og upplestur Árna Hjartarsonar um bein, drauga, skáld og sakamenn á safnanótt í Þjóðminjasafninu á föstudagskvöld, sem haldin var í tengslum við Vetrarhátíð í Reykjavík.

Wallström fer ekki fram

Margot Wallström hefur tilkynnt að hún muni ekki bjóða sig fram í þingkosningunum í Svíþjóð árið 2006, þar sem hún telur stöðu sína hjá Evrópusambandinu ekki bjóða upp á það, en hún er varaforseti framkvæmdastjórnar ESB.

Myndband af líkamsárás á Netinu

Myndbandi með líkamsárás í Hafnarstræti í Reykjavík, sem leiddi til dauða ungs manns, er dreift á Netinu. Myndbandið er úr eftirlitsmyndavél lögreglunnar og var sönnunargagn í málinu gegn árásarmönnunum. Yfirlögregluþjónn í Reykjavík segir þetta afar ósmekklegt.

Landsnet endurskoðar áætlanir

Landsnet verður að endurskoða áætlanir sínar um Fljótsdalslínu eftir að iðnaðarráðuneytið synjaði eignarnámsheimild vegna tveggja jarða á Austurlandi.

Vinni saman að reykingabanni

Atvinnulífið og stjórnvöld eiga að vinna saman að jafnmikilvægum málum og banni við reykingum á veitingastöðum. Þetta segir framkvæmdastjóri Samtaka ferðaþjónustunnar sem óttast um afdrif vínveitingastaða verði slíku banni komið á.

Nærri 130 börn látin vegna kulda

Tæplega 130 afgönsk börn hafa látist úr kulda á síðustu vikum. Örvæntingarfullir foreldrar gefa börnunum sínum ópíum til að lina þjáningarnar, segir heilbrigðisráðherra landsins.

Haförn undir rafrænu eftirliti

Haferninum, sem notið hefur aðhlynningar í Húsdýragarðinum undanfarnar vikur, var sleppt austur í Grafningi í dag. Örninn verður þó undir rafrænu eftirliti fyrst um sinn.

Reykjanesvirkjun stækkuð

Hitaveita Suðurnesja stefnir að því á næstu árum að tvöfalda afkastagetu Reykjanesvirkjunar svo að hún verði 200 megavött. Virkjunin verður þá ein sú stærsta á landinu.

Sandgerði stenst prófið

Öll skilyrði sem sjávarútvegsráðuneytið setur um byggðakvóta eru uppfyllt af bæjarstjórn Sandgerðis, að sögn Árna M. Mathiesen sjávarútvegsráðherra.

Atlantsolía opnar í Reykjavík

Steinunn Valdís Óskarsdóttir borgarstjóri opnar fyrstu bensínstöð Atlantsolíu í Reykjavík klukkan hálf þrjú í dag. Hugi Hreiðarsson, markaðsstjóri Atlantsolíu, segir stefnt að því að opna fleiri stöðvar á höfuðborgarsvæðinu fyrir árslok.

Fjögur atkvæði réðu úrslitum

Ólafur Loftsson, formaður Kennarafélags Reykjavíkur, var kosinn formaður Félags grunnskólakennara á aðalfundi félagsins sem haldinn var á föstudag og laugardag á Hótel Selfossi.

Þúsundir á Þjóðahátíð

Nokkur þúsund mættu á Þjóðahátíð Alþjóðahúss í Perlunni í gær. Hátíðin var haldin í annað sinn og spáir framkvæmdastjóri Alþjóðahúss, Einar Skúlason, því að hún stækki enn að ári.

Nafn mannsins sem lést

Maðurinn sem lést í vélsleðaslysi á Landmannaleið í fyrrinótt hét Bjarni Sveinsson og var til heimilis að Þernunesi 7 í Garðabæ.

Mistókst að ná peningum

Tveir menn ógnuðu starfsfólki með hnífum í Árbæjarapóteki í hádeginu í gær og höfðu á brott með sér talsvert magn að örvandi lyfjum.

Þriggja tonna tjakki stolið

Brotist var inn í fiskvinnslufyrirtæki á Reykjanesi í fyrrinótt og hvarf þjófurinn á brott með verkfærakistu á hjólum, rafsuðutæki, hátíðnisuðutæki og þriggja tonna tjakk.

Áhættuatriði endaði illa

Tvítugur maður fékk höfuðáverka þegar hann var að leika í myndbandi sem félagar hans voru að taka upp í Siglufjarðarskarði um fimmleytið í fyrradag.

Bein grænlenskra á Skriðuklaustri?

Hugsanlega skýrist á morgun hvort bein sem fundust við fornleifauppgröft á Skriðuklaustri séu af grænlensku fólki. Komi það á daginn er það skýr vísbending um að tengsl Íslendinga og Grænlendinga hafi verið meiri en áður var talið.

SÞ rannsakar morðið á Hariri

Kofi Annan, aðalritari Sameinuðu þjóðanna, ætlar að senda hóp sérfræðinga til Líbanons til að rannsaka morðið á Rafik Hariri, fyrrum forsætisráðherra landsins.

756 prestar áskaðir um misnotkun

Rómversk-kaþólsku kirkjunni í Bandaríkjunum bárust á síðasta ári 1.092 nýjar ásakanir um kynferðislega misnotkun presta á börnum.

Kosið um stjórnarskrá ESB

Þjóðaratkvæðagreiðsla um nýja stjórnarskrá Evrópusambandsins fer fram á Spáni í dag. Spánverjar verða þar með fyrsta þjóðin til að kjósa um stjórnarskrána en tíu aðrar þjóðir innan sambandsins hafa tilkynnt að þær ætli að bera hana undir þjóðaratkvæði.Ef eitt ríki neitar að staðfesta stjórnarskrána tekur hún ekki gildi.  

Norður-Kórea vill engar viðræður

Stjórnvöld í Norður-Kóreu útiloka nú tvíhliða viðræður við Bandaríkjastjórn um kjarnorkuætlun landsins. Kínverska fréttastofan Xinhua hafði þetta eftir embættismanni norður-kóreska utanríkisráðuneytisins í gær.

50 létust í sprengjuárásum

Að minnsta kosti 50 manns létust í sprengjuárásum uppreisnarmanna í Írak í gær þegar Ashoura, trúarhátíð sjía-múslíma, náði hámarki. Meira en hundrað manns særðust í árásunum. Talið er að súnní-múslímar hafi skipulagt árásirnar.

Dragnótaveiðar innst í Eyjafirði

Smábátasjómenn við Eyjafjörð eru ævareiðir vegna heimildar sem sjávarútvegsráðuneytið veitti til dragnótaveiða í innanverðum Eyjafirði. Ráðuneytið vildi koma til móts við fiskeldi Brims en smábátasjómenn segja afkomu sinni ógnað og lífríki Eyjafjarðar og náttúruminjar séu í hættu.

Grásleppuvertíðin stytt

Vegna verðfalls á grásleppuhrognum og umframbirgða frá síðustu vertíð telur Landssamband smábátaeigenda nauðsynlegt að takmarka framboð á hrognum í ár.

Ekið á annan tug hreindýra

Nýtt vandamál blasir við á Austfjörðum. Á síðustu mánuðum hefur verið keyrt á á annan tug hreindýra og ástæðan er m.a. sögð aukin umferð á hreindýrasvæðum.

Flugvél með fallhlíf

Öruggasta einkaflugvél í heimi rennur í stríðum straumi út úr verksmiðjunni í Minnesota í Bandaríkjunum. Íslendingurinn Snorri Guðmundsson á þátt í hönnun vélarinnar sem er framleidd með fallhlíf fyrir alla vélina.

Lést í vélsleðaslysi

Karlmaður á vélsleða beið bana þegar hann ók fram af hárri hengju á Landmannaleið til móts við Sauðleysu seint í gærkvöldi. Félagi hans, sem var á öðrum sleða, þurfti að aka langa leið til að komast í síma og kalla á þyrlu Landhelgisgæslunnar. Þegar hún lenti á vettvangi með lækni var maðurinn látinn og er talið að hann hafi látist samstundis. Snjókoma og slæmt skyggni var þegar slysið varð.

Þremur mönnum rænt í Írak

Tveim blaðamönnum frá Indónesíu var rænt í borginni Ramadi í Írak fyrr í vikunni. Talsmaður stjórnvalda í Írak greindi frá þessu í morgun. Bílstjóra blaðamannanna var einnig rænt sem og bílaleigubíl sem þeir höfðu á leigu.

Þrennt á slysadeild eftir árekstur

Þrír voru fluttir á slysadeild Landsspítalans eftir harðan árekstur tveggja bíla á mótum Þrengslavegar og Suðurlandsvegar í gærkvöldi. Enginn er þó lífshættulega slasaður. Vegna skyndilegrar hálku rann bíll af Þrengslavegi inn á Suðurlandsveg í veg fyrir bíl þar.

Handtekin vegna bankaráns

Lögreglan á Írlandi handtók í gær sjö manns sem grunaðir eru um að hafa framið mesta bankarán í sögu Norður-Írlands fyrir tveim mánuðum. Nærri 300 milljónir króna fundust í híbýlum mannanna, en það er þó ekki nema brot af því sem stolið var.

Bílaflutningabíll ók á jeppa

Fimm bílar skemmdust, þar af kastaðist einn mannlaus bíll út í móa og hafnaði á hvolfi, þegar jeppi og bílaflutningabíll með þrjá bíla á dráttarvagni lentu í hörðum árekstri í Miðfirði í gærkvöldi. Ökumenn flutningabílsins og jeppans sluppu ómeiddir þótt jeppinn sé gjörónýtur.

Sonur Sharons sóttur til saka

Dómsmálaráðherra Ísraels ákvað í gær að höfða mál á hendur syni Ariels Sharons, forsætisráðherra Ísraels. Omri Sharon er gefið að sök að hafa sett á stofn fyrirtæki erlendis sem sendi síðan fjármagn í kosningasjóði föður hans. Þá er hann einnig sakaður um frekara bókhaldssvindl og meinsæri.

Björguðu þriggja marka dreng

Læknum í Bandaríkjunum hefur tekist að bjarga dreng sem vó aðeins þrjár merkur við fæðingu. Hjarta drengsins var á stærð við vínber þegar hann fæddist og þurfti að víxla hjartaslagæðum svo að hann myndi lifa af. Jafnlétt barn hefur aldrei áður lifað slíka aðgerð af.

Tókust á við lögreglumenn

Lögreglumenn í Keflavík þurftu að beita piparúða á tvo ofstopamenn á veitingahúsi í bænum laust eftir miðnætti eftir snörp átök við þá. Við úðann dösuðust mennirnir svo lögregla kom járnum á þá og flutti þá í fangageymslur þar sem þeir sofa úr sér ölvímu. Einn lögreglumaður þurfti að leita læknis í kjölfar þess að annar mannanna sparkaði harkalega í hann.

Allir hópar verði í ríkisstjórn

Ibrahim al-Jaafari, sem talið er líklegt að verði forsætisráðherra Íraks, segir að í nýrri ríkisstjórn verði að vera fulltrúar allra helstu hópa í landinu. Jaafari fer fyrir bandalagi sjíta en hann segir að í ríkisstjórninni verði einnig Kúrdar og súnnítar þrátt fyrir að þeir síðarnefndu hafi nær ekkert fylgi hlotið í nýafstöðnum kosningum.

Innbrotahrina á höfuðborgarsvæðinu

Enn var brotist inn í íbúðarhús í Hafnarfirði í gær og þaðan stolið verðmætum. Nokkuð hefur verið um innbrot þar að undanförnu, gjarnan um hábjartan daginn, og stórir hlutir á borð við sjónvörp og tölvur borin út án þess að nokkur virðist taka eftir því. Fyrr í vikunni var heilli búslóð stolið úr bílskúr í Breiðholti þar sem hún var í geymslu.

Glitský á austurhimni í Reykjavík

Mjög falleg glitský sáust á austurhimninum frá Reykjavík séð á níunda tímanum í morgun, en þau sjást að jafnaði aðeins á nokkurra ára fresti frá Reykjavík. Að sögn Friðjóns Magnússonar eru þetta líka kölluð perlumóðuský, dregið af litbrigðunum sem sjást þegar horft er inn í perlumóðuskel.

Sprengdi sig í loft upp í mosku

Sjálfsmorðsárásarmaður drap fjóra hið minnsta og særði tuttugu og tvo inni í mosku sjíta í suðurhluta Bagdad í morgun. Sjónarvottar segja að árásarmaðurinn hafi borið sprengjubelti um sig miðjan og kveikt í því þegar hann kom inn í moskuna. Sjítamúslimar fagna þessa dagana Ashura sem er mikilvæg trúarhátíð til minningar um píslarvætti barnabarns Múhameðs spámanns.

Börn sögð hríðfalla vegna kulda

Talið er að ríflega eitt þúsund afgönsk börn hafi látið lífið úr sjúkdómum sem rekja má til óveðurs og óvenjumikils snjóþunga og kulda um miðbik landsins síðustu vikurnar. Hjálparstarfsmenn sem könnuðu aðstæður í sextán þorpum í Ghor-héraði segja að ástandið sé skelfilegt og börn undir fimm ára aldri hríðfalli.

Árás á aðra sjítamosku í Bagdad

Árás var gerð á aðra sjítamosku í Bagdad í Írak fyrir stundu með þeim afleiðingum að að minnsta kosti einn lést og fjórir særðust. Moskan er í vesturhluta Bagdad og samkvæmt lögreglu var eldflaug skotið á hana. Fyrr í morgun myrti sjálfsmorðsárásarmaður að minnsta kosti fjóra og særði 22 inni í mosku sjíta í suðurhluta Bagdad.

Tugir látnir í árásum á moskur

Tugir liggja í valnum eftir árásir sem voru gerðar á að minnsta kosti tvær moskur sjítamúslíma í Bagdad í Írak í morgun. Sjítar halda eina mikilvægustu trúarhátíð sína þessa dagana.