Hyggjast ó­gilda vega­bréfsá­ritanir allt að 200 þúsund hælis­leit­enda

Ákvörðunin gæti haft áhrif á allt að 200 þúsund einstaklinga.

Talsmaður utanríkisráðuneytisins sagði í tilkynningu í gær að Donald Trump Bandaríkjaforseti og Marco Rubio utanríkisráðherra væru staðráðnir í því að koma þeim skilaboðum á framfæri að vegabréfsáritanir væru forréttindi.

Tommy Pigott sagði tímabundnar vegabréfsáritanir vegna ferðalaga og viðskipta gefnar út á þeim forsendum að viðkomandi ætluðu sér að snúa aftur til heimalands síns.

Yfirvöld vestanhafs hafa hætt vinnslu hælisumsókna, þrátt fyrir að alríkisdómstólar hafi sagt það andstætt lögum. 

Alríkisdómstóll í New York úrskurðaði á föstudag að stjórnvöldum væri óheimilt að hætta útgáfu vegabréfsáritana til einstaklinga frá 75 ríkjum á bannlista yfirvalda. Dómarinn í málinu sagði bannið grundvallað á þeirr staðhæfingu utanríkisráðuneytisins að einstaklingar frá þessum ríkjum myndu enda á bótum í Bandaríkjunum. 

Það stæðist ekki skoðun.

Utanríkisráðuneytið fyrirskipaði sendiráðum og -skrifstofum að fresta öllum viðtölum vegna umsókna um vegabréfsáritanir þar til starfsmenn hefðu fengið þjálfun í nýrri og strangari nálgun. 

Samkvæmt New York Times mun þjálfunin fara fram í þessari viku, víðast hvar.

Hún er meðal annars sögð fela í sér að starfsmenn beri kennsl á umsækjendur sem eru líklegir til að verða baggi á hinu opinbera ef þeir fá ótímabundna heimild til að búa og starfa í Bandaríkjunum.