Tveggja marka sigur PSG hefði hæg­lega getað orðið stærri

PSG er með 2-0 forystu í einvíginu gegn Liverpool í átta liða úrslitum Meistaradeildarinnar. Desiré Doué og Kvicha Kvaratskhelia skoruðu mörkin en þau hefðu hæglega getað verið fleiri.

Eftir fína byrjun á leiknum var heppnin með PSG í liði þegar Desiré Doué skaut skoti fyrir utan vítateig á 11. mínútu.

Boltinn skoppaði af varnarmanni og yfir markmanninn Giorgi Mamardashvili. Einstaklega svekkjandi fyrir Liverpool en verðskuldað mark hjá heimamönnum.

Mamardashvili kom hins vegar í veg fyrir að forystan stækkaði fyrir hálfleik. Desiré Doué og Ousmane Dembelé komust báðir í dauðafæri en tókst ekki að sigra markmanninn.

Á hinum endanum tók Liverpool ekki eitt einasta skot í fyrri hálfleik.

Kvicha Kvaratskhelia komst svo í frábært færi í upphafi seinni hálfleiks en aftur varði Mamardashvili.

Kvaratskhelia sigraði markmanninn hins vegar skömmu síðar á 65. mínútu þegar hann sólaði sig í gegnum vörnina og rak boltann yfir línuna.

PSG hefði hæglega getað bætt fleiri mörkum við en boltinn vildi ekki inn og skoppaði af stönginni í eitt skiptið. Heimamenn vildu síðan fá vítaspyrnu undir lok leiks en Liverpool slapp með skrekkinn.

Liðin mætast aftur næsta þriðjudag og ljóst er að Liverpool þarf á mun betri frammistöðu að halda til að detta ekki úr leik í Meistaradeildinni.