Rétta yfir löggu fyrir að­gerða­leysi á meðan börn og kennarar voru myrt

Tæplega fjögur hundruð lögregluþjónar mættu á vettvang árásarinnar en þrátt fyrir það liðu 77 mínútur þar til morðinginn var felldur.

Myndbönd úr skólanum sýndu að þeir fyrstu sem mættu á vettvang hörfuðu frá árásarmanninum og biðu á göngum skólans á meðan skothljóð heyrðust úr kennslustofunni og á meðan nemendur sem þóttust vera dáir inni í skólastofunni hringdu eftir aðstoð.

Gonzales og Pete Arredono voru með þeim fyrstu sem mættu á vettvang og eru þeir einu sem hafa verið ákærðir. Eins og áður segir hefjast réttarhöldin gegn Gonzales í dag en ekki er búið að ákveða dagsetningu fyrir réttarhöldin gegn Arredono, samkvæmt AP fréttaveitunni.

Gonzales stendur frammi fyrir allt að tveggja ára fangelsisvist. Hann hefur lýst yfir sakleysi sínu og AP hefur eftir lögmanni hans að Gonzales hafi reynt að bjarga lífi barna þennan dag.

Hér að neðan má sjá frétt héraðsmiðilsins WFAA um réttarhöldin gegn Gonzales og lögregluþjóninn sjálfan.

Foreldrar og aðrir ættingjar nemenda og kennara sem dóu í árásinni hafa kvartað yfir því að fleiri lögregluþjónar hafi ekki verið ákærðir. Þau hafa höfðað einkamál gegn fjölmörgum lögregluþjónum.

Sjá einnig: Höfða mál gegn hundrað lögregluþjónum vegna árásarinnar í Uvalde

Í grein AP segir að saksóknarar eigi ærið verk fyrir höndum, þar sem reynslan sýni að kviðdómendur séu ólíklegir til að sakfella lögregluþjóna fyrir aðgerðaleysi. Það hafi til að mynda sést í réttarhöldunum gegn lögregluþjóni sem ákærður var í kjölfar Parkland-árásarinnar árið 2018.

Scot Peterson var gert að setjast í helgan stein eftir árásina í Parkland en hann var eini vörður skólans og upptökur úr myndavélum sýndu hann bíða fyrir utan húsið á meðan árásarmaður var þar inni að myrða fólk.

Peterson sagði á sínum tíma að ástæðan hafi verið sú að hann vissi ekki hvar árásarmaðurinn væri og taldi hann að leyniskytta væri að skjóta.

Sjá einnig: „Ég myndi aldrei sitja þarna og leyfa krökkunum mínum að vera slátrað“

Upprunalega stóð til að réttarhöldin gegn Gonzales færu fram í Uvalde en lögmenn hans fóru fram á að þau yrðu haldin annars staðar. Það var vegna þess að lögregluþjónninn fyrrverandi ætti ekki séns á réttlátum réttarhöldum í bænum. Því voru saksóknarar ekki ósammála.