Byrjunar­lið Ís­lands: Arnar gerir fimm breytingar

Ísland mætir Norður-Írlandi í æfingaleik klukkan 18:45. Leikurinn verður sýndur beint á Stöð 2 Sport og hefst útsending klukkan 18:20.

Karlalandsliðið í fótbolta vann góðan sigur á Hampden Park á föstudagskvöldið var. Nokkrir óvæntir hlutir blöstu við í byrjunarliði Íslands þar, til að mynda að þeir Elías Rafn Ólafsson og Hörður Björgvin Magnússon væru í liðinu.

Elías átti stórleik en Hörður gat ekki spilað meira en 45 mínútur, eðlilega, eftir langa baráttu við meiðsli síðustu tvö árin.

Báðir víkja þeir í dag. Hákon Rafn Valdimarsson stendur milli stanga íslenska marksins, en Arnar hafði þegar greint frá því í aðdraganda leiks að Hákon myndi vera í markinu.

Hörður Björgvin víkur úr vörninni sem og Mikael Egill Ellertsson sem var í vinstri bakverði. Daníel Leó Grétarsson er í miðverði og Logi Tómasson í bakverði. Þeir Guðlaugur Victor Pálsson og Sverrir Ingi Ingason byrja með þeim í vörninni, þrátt fyrir að hafa báðir meiðst lítillega á föstudag.

Arnar gerir einnig tvær breytingar á miðjunni, þeir Willum Þór Willumsson og Arnór Ingvi Traustason, sem komu inn á miðjuna í seinni hálfleik í Glasgow, byrja báðir í kvöld á kostnað Skagamannanna Ísaks Bergmann Jóhannessonar og Stefáns Teits Þórðarsonar.

Fremstu fjórar stöðurnar eru óbreyttar. Þær manna Jón Dagur Þorsteinsson, Albert Guðmundsson, fyrirliðinn Hákon Arnar Haraldsson og Andri Lucas Guðjohnsen er frammi.

Byrjunarlið Íslands:

• Markvörður: Hákon Rafn Valdimarsson
• Hægri bakvörður: Guðlaugur Victor Pálsson
• Miðvörður: Sverrir Ingi Ingason
• Miðvörður: Daníel Leó Grétarsson
• Vinstri bakvörður: Logi Tómasson
• Hægri kantmaður: Jón Dagur Þorsteinsson
• Miðjumaður: Arnór Ingvi Traustason
• Miðjumaður: Willum Þór Willumsson
• Vinstri kantmaður: Hákon Arnar Haraldsson (fyrirliði)
• Sóknartengiliður: Albert Guðmundsson
• Sóknarmaður: Andri Lucas Guðjohnsen