Innlent

ESA segir reglur um vernd dýra brotnar með blóðmerahaldi

Samúel Karl Ólason skrifar
Skjáskot úr þýsku myndbandi sem segja má að varpað hafi ljósi á blóðmerarhald fyrir hinum almenna Íslendingi.
Skjáskot úr þýsku myndbandi sem segja má að varpað hafi ljósi á blóðmerarhald fyrir hinum almenna Íslendingi. TSB TIERSCHUTZBUND ZURICH

Eftirlitsstofnun EFTA (ESA) segir Íslendinga brjóta gegn reglum EES um vernd dýra sem notuð eru í vísindaskyni með blóðmerahaldi. Stofnunin sendi formlegt áminningarbréf til Íslands í dag þar sem kallað er eftir því að reglunum verði fylgt.

Í tilkynningu frá ESA segir að stofnunin hafi upplýst íslensk stjórnvöld í apríl um að kvörtun hefði borist vegna reglna um blóðtöku á fylfullum hryssum. Það blóð er notað til framleiðslu sérstaks meðgönguhormóns sem notað er til að auka og stýra frjósemi í öðrum dýrum eins og svínum, kúm og kindum.

„Í ljósi upplýsinga sem bárust frá Íslandi í tengslum við blóðtökuna, telur ESA að Ísland sé brotlegt við reglur EES-samningsins,“ segir í tilkynningunni.

Þar segir að stofnunin hafi komist að þeirri niðurstöðu að íslandi hafi ekki staðið við skuldbindingar sínar samkvæmt EES-tilskipuninni um vernd dýra sem notuð eru í vísindaskyni, með því að fylgja ekki málsmeðferð og framkvæma ekki það mat sem þar sé kveðið á um. Tilgangur þessarar tilskipunar er að bæta velferð dýra sem notuð eru í vísindaskinu og draga úr notkun dýra eins og mögulegt er.

Tilskipunin mælir fyrir því að tryggja þurfi ákveðnar verndarráðstafanir þegar ákvörðun sé tekin um hvort heimila eigi tiltekin verkefni þar sem dýr eru notuð. Í tilkynningu ESA segir að Ísland sé þeirrar skoðunar að blóðmerahald falli ekki undir gildissvið íslenskrar reglugerðar sem innleiði tilskipun ESA og því sé áðurnefndum verndarráðstöfunum ekki beitt sem slíkum.

„Sem dæmi má nefna að mat á verkefni í samræmi við tilskipunina er ekki framkvæmt áður en leyfi er veitt fyrir verkefninu. Það hefur meðal annars í för með sér að ekki er hægt að tryggja að fram fari mat á hvort í staðinn sé hægt að nota aðra vísindalega fullnægjandi aðferð, sem ekki felur í sér notkun lifandi dýra. Að sama skapi er matið á verkefninu nauðsynleg til þess að sá skaði sem líklegt er að dýrið verði fyrir sé veginn og metinn á móti þeim ávinningi sem búist er við að verkefnið skili.“

ESA telur einnig að ný reglugerð frá ágúst í fyrra auki enn frekar á réttaróvissu um blóðmerahald og tryggi ekki skilvirkni tilskipunar EES.

Áminningarbréfið er fyrsta skrefið í samningsbrotaferli gegn EES EFTA-ríki. Íslendingar hafa tvo mánuði til að koma sínum sjónarmiðum á framfæri og í kjölfar þess verður ákveðið innan ESA hvort fara eigi lengra með málið.

Bréf ESA til Íslands má sjá hér.


Tengdar fréttir

Eiginleikum og ímynd íslenska hestins ógnað fyrir hagsmuni Ísteka

Dýraverndarsamtökin AWF/TSB, sem stóðu að gerð margumtalaðrar heimildarmyndar um blóðmerahald á Íslandi, segja hneyksli að fyrirtækið sem kaupir merablóð af bændum og hagnast á framleiðslunni sé nú í fyrsta sinn að greina frá frávikum við blóðtökuna.

Segir Ís­teka starfa í skugganum með græðgina að leiðar­ljósi

„Það eru þarna jákvæð atriði, eins og að blóðtökuhryssum hefur fækkað og það eru færri bændur og dýralæknar sem vilja taka þátt í þessu. Og það er auðvitað merki um að barátta okkar hefur skilað sér til fólksins og að fólk sé almennt upplýstara um þetta.“

Flestir umsagnaraðilar fylgjandi banni við blóðmerahaldi

Fimmtán umsagnir bárust um endurflutt frumvarp Ingu Sæland um bann við blóðmerahaldi en umsagnarfresturinn rann út í gær. Langflestir sem sendu inn umsögn eru fylgjandi banninu og fordæma meðferð hrossanna, meðal annars hversu mikið blóð sé tekið á skömmum tíma.

Blóð tekið úr 4.141 hryssu á 90 starfsstöðvum

Tekið var blóð úr 4.141 hryssu til framleiðslu eCG/PMSG hórmónsins í ár en heildarfjöldi blóðtökuhryssna í stóðum bænda var 4.779. Tekið var blóð í um 24 þúsund skipti alls, á 90 starfsstöðvum. Í fyrra voru starfsstöðvarnar 120.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×