Hækkar laun um 45 prósent rétt fyrir kosningar

Þetta er í annað sinn á nokkrum mánuðum sem forsetinn hækkar laun opinberra starfsmanna í Tyrklandi um tugi prósenta. Hann tilkynnti hækkunina í sjónvarpsávarpi í morgun og sagði hann að hækkunin myndi ná til um sjö hundruð þúsund manns.

Slæmt ásigkomulag hagkerfis Tyrklands hefur komið niður á kosningabaráttu Erdogans fyrir forsetakosningarnar seinna í mánuðinum.

Erdogan leiðir Réttlætis- og þróunarflokkinn í Tyrklandi eða AKP. Hann er fæddur árið 1954 og hefur verið við völd í Tyrklandi í tvo áratugi. Hann varð fyrst forsætisráðherra árið 2003 en varð í kjölfarið forseti árið 2014. Hann mátti ekki verða forsætisráðherra aftur þar sem hann hafði setið þrjú kjörtímabili. AKP-flokkurinn beitti sér þá fyrir því að færa völd til forsetaembættisins og varð Erdogan kjörinn forseti.

Völd forsetaembættisins hafa verið aukin til muna og hefur Erdogan verið lýst sem valdamesta manni Tyrklands frá dögum Atatúrks. Hermenn reyndu að ræna völdum af Erdogan árið 2016 en í kjölfar þess fóru forsvarsmenn AKP í umfangsmiklar hreinsanir í Tyrklandi þar sem tugir þúsunda voru fangelsaðir og reknir úr störfum.

Líklega tvær lotur

Tyrkir ganga til kosninga þann 14. maí, í fyrstu lotu nýrra forsetakosninga.

Þrír menn hafa boðið sig fram gegn Erdogan. Einn þeirra stendur þó öðrum framar, miðað við skoðanakannanir og það er Kemal Kilicdaroglu, sem er frambjóðandi bandalags stjórnarandstöðuflokka í Tyrklandi. Hann hefur mælst með naumt forskot á Erdogan

Sjá einnig: Stjórnar­and­staðan sam­einast um mót­fram­bjóðanda gegn Erdogan

Kilicdaroglu hefur heitið því að auka frelsi og lýðræði í Tyrklandi á nýjan leik og gera stefnubreytingu með því markmið að færa Tyrkland nær Vesturlöndum aftur.

Samkvæmt frétt BBC búast sérfræðingar við því að enginn frambjóðandi muni fá meira en helming atkvæða og því þurfi að halda aðrar kosningar þann 28. maí.

Kvörtuðu yfir ósanngjarnri kosningabaráttu

Forsvarsmenn stjórnarandstöðunnar kvörtuðu í gær yfir yfirráðum Erdogans á fjölmiðlum í Tyrklandi og sögðu kosningabaráttuna vera ósanngjarna. Samkvæmt frétt AP fréttaveitunnar er mikið til í því.

Ríkisstjórnin, AKP og bakhjarlar flokksins stjórna um níutíu prósentum af fjölmiðlum Tyrklands, samkvæmt Blaðamönnum án landamæra, og hefur Erdogan fengið mun meiri og jákvæðari umfjöllun en Kilicdaroglu

Stjórnarandstaðan vísar til þess að í apríl hafi verið fjallað um Erdogan í um 33 klukkustundir í stærstu sjónvarpsstöð landsins í ríkiseigu. Á sama tímabili mun hafa verið fjallað um Kilicdaroglu í 32 mínútur.

Jarðskjálftinn kemur niður á Erdogan

Jarðskjálftahrina sem lék íbúa Suður-Tyrklands grátt fyrr á árinu og viðbrögð stjórnvalda við hamförunum hafa komið niður á vinsældum Erdogans. Blaðamaður BBC ræddi til að mynda við konu sem sagðist vilja sjá Erdogan dauðan. Það sagði hin 68 ára gamla kona, þrátt fyrir að hægt sé að dæma fólk í fangelsi fyrir að móðga forsetann.

Tyrkir hafa margir hverjir gagnrýnt ríkisstjórn Tyrklands harðlega í kjölfar jarðskjálftanna, sem tugur þúsunda dóu vegna í Tyrkalndi og í Sýrlandi. Opinberar tölur segja rúmlega fimmtíu þúsund hafa dáið, bæði í Tyrklandi og í Sýrlandi, en talið er að raunverulegur fjöldi látinna sé mögulega mun hærri.

Erdogan hefur verið sakaður um að leyfa verktökum að brjóta lög um byggingar húsa og að eftirlit með nýbyggingum hafi verið lítið sem ekkert.

Tyrkir hafa einnig kvartað sáran yfir efnhagsaðstæðum í Tyrklandi, þar sem verðbólga er mjög há. Erdogan hefur heitið því að draga úr verðbólgu og lækka stýrivexti.

Can Selcuki, stjórnmálasérfræðingur sem BBC ræddi við, segir að jarðskjálftinn og verðbólgan muni þó ekkert koma niður á Erdogan. Kosningarnar snúist ekki um frammistöðu hans heldur persónu.

„Þeir sem vilja hann, vilja hann sama hvað.“