Íslenski boltinn

Baldur um HK: „Eru með umtalaðan skemmtikraft“

Ingvi Þór Sæmundsson skrifar
Marciano Aziz skoraði tíu mörk í jafn mörgum leikjum fyrir Aftureldingu í Lengjudeildinni síðasta sumar.
Marciano Aziz skoraði tíu mörk í jafn mörgum leikjum fyrir Aftureldingu í Lengjudeildinni síðasta sumar. vísir/diego

Baldur Sigurðsson er hræddur um að HK gæti átt erfitt sumar í vændum. Liðinu er spáð 12. sæti Bestu deildar karla í spá íþróttadeildar Vísis og Stöðvar 2 Sports.

„Eðlilega held ég að þetta gæti orðið erfitt sumar fyrir þá. Ég held að þeir og þeirra stuðningsmenn eigi alveg von á því að þeim verði spáð í neðsta sæti í sennilega öllum spám, allavega fallsæti. Það er eðlilegt í ljósi þess að þeir eru nýliðar og treysta á miklu leyti á þann kjarna sem féll fyrir tveimur árum og kom aftur upp en með nokkrum spennandi viðbótum,“ sagði Baldur sem er einn sérfræðinga Stöðvar 2 Sports um Bestu deildina.

HK skoraði aðeins sjö mörk í fimm leikjum í Lengjubikarnum og þar af komu fjögur í einum og sama leiknum. Baldur hefur áhyggjur af því hvernig HK ætlar að skora nógu mörg mörk til að halda sér uppi.

„Þrátt fyrir að varnarleikurinn verði mikilvægasti þátturinn fyrir árangri hefur maður mestar áhyggjur af markaskorun. Þeir höfðu Stefán Inga [Sigurðarson] í fyrra og hann var þeirra aðalmarkaskorari en hann er farinn aftur til Breiðabliks. Maður sér í fljótu bragði ekki hver á að fylla í það skarð,“ sagði Baldur.

„En þeir eru með umtalaðan skemmtikraft sem ég held að flestir viti af, Marciano Aziz sem kom frá Aftureldingu. Það er markaskorun í honum en hann á eftir að spreyta sig á stærsta sviðinu og fleiri þurfa að koma að markaskorun. En maður sér ekki hver á að taka það hlutverk að sér og af því hefur maður áhyggjur.“

Fyrsti leikur HK í Bestu deildinni er gegn Breiðabliki 10. apríl.




Fleiri fréttir

Sjá meira


×