Snúnar kjara­við­ræður fram undan eftir hóp­upp­sögn Eflingar

Kjara­samningar Sam­taka at­vinnu­lífsins við Starfs­greina­sam­bandið og Eflingu renna út í haust og því styttist óðum í að kjara­við­ræður hefjist á ný.

Þor­steinn Víg­lunds­son, fyrr­verandi fé­lags­mála­ráð­herra og fram­kvæmda­stjóri Sam­taka at­vinnu­lífsins, segir deilurnar innan hreyfingarinnar setja vondan tón fyrir kjara­við­ræðurnar.

„Ég held að það sé ein­séð að þær verði mjög snúnar já. Þegar slíkt bætist við þá þessa ólgu sem verið hefur innan hreyfingarinnar veldur það mikilli ó­vissu inn í kjara­við­ræður og mun vafa­lítið gera þær snúnari en ella,“ segir Þor­steinn sem nú starfar sem for­stjóri BM Vallár.

Verkalýðshreyfingin sundruð

Hann bendir á að gríðar­leg reynsla við kjara­við­ræður hljóti að tapast innan Eflingar þegar öllu starfs­fólki hefur verið sagt upp.

„Innan allra stéttar­fé­laga er gríðar­lega mikil þekking og reynsla á undir­búningi kjara­við­ræðna og fram­kvæmd þeirra og það er bara ó­ljóst hver staðan verður á fé­laginu þegar út í við­ræðurnar verður komið í haust,“ segir Þor­steinn sem man ekki eftir annarri eins stöðu innan verka­lýðs­hreyfingarinnar.

„Segjum bara eins og er - það er bara stór­furðu­legt að horfa upp á stéttar­fé­lag koma með þessum hætti fram við starfs­fólk sitt,“ segir Þor­steinn.

Hann furðar sig á að svo virðist sem sumir for­ystu­menn annarra verka­lýðs­fé­laga setji sig ekki upp á móti hóp­upp­sögninni.

„Það hefði vakið furðu hér áður fyrr alla­vega að sjá slík við­brögð við að­gerðum. Það er langt frá því ein­hver sátt innan hreyfingarinnar eða hægt að líta svo á að for­ystu­fólk þessara sam­taka hafi ó­skorðað um­boð fé­lags­manna sinna,“ segir Þor­steinn Víg­lunds­son, for­stjóri BM Vallár.