Segja Rússa undirbúa fölsun tilefnis til árásar

Bandaríkjamenn óttast mögulega innrás og segja hana geta hafist á næstu vikum.

Jan Psaki, talskona Joes Biden, forseta Bandaríkjanna, sagði í dag að umrædd sveit væri skipuð sérfræðingum í bardögum í byggðum og sprengjusérfræðingum. Þeir geti beitt sprengiárásum gegn aðskilnaðarsinnum í austurhluta Úkraínu,sem Rússar styðja, til að réttlæta innrás.

„Við óttumst að ríkisstjórn Rússlands sé að undirbúa innrás í Úkraínu sem gæti leitt til mannréttindabrota og stríðsglæpi, nái þeir ekki markmiðum sínum fram við samningaborðið,“ sagði Psaki samkvæmt AP fréttaveitunni.

John Kirby, talsmaður varnarmálaráðuneytis Bandaríkjanna, lýsti upplýsingum Bandaríkjamanna sem trúverðugum en heimildarmaður AP innan úr leyniþjónustusamfélaginu segir þær meðal annars byggja á hlerunum Bandaríkjamanna á skilaboðum milli Rússa. 

Upplýsingunum og undirliggjandi gögnum hefur verið deilt með bandamönnum Bandaríkjanna, samkvæmt frétt New York Times.

Hér má sjá ummæli Kirby um ástandið frá því í dag.

Gífurleg spenna á svæðinu

Rússar hafa komið fyrir gífurlegum fjölda hermanna, skriðdreka og annarra hertóla við landamæri Úkraínu á undanförnum mánuðum og er óttast að þeir gætu gert aðra innrás í landið. Gífurleg spenna er á svæðinu.

Ríkisstjórn Vladimírs Pútín, forseta Rússlands, hefur krafist þess að Atlantshafsbandalagið meini Úkraínu aðgang að bandalaginu og flytji alla hermenn og herbúnað frá þeim ríkjum sem gengu til liðs við NATO eftir 1997.

Þar á meðal eru Pólland og Eystrasaltsríkin, sem hafa varað við því að Rússar vilji auka umsvif sín á svæðinu og draga úr fullveldi þeirra.

Fjölmargar stofnanir í Úkraínu urðu á dögunum fyrir umfangsmikilli tölvuárás. Í þeirri árás var skilaboðum komið fyrir á síðum stofnana þar sem Úkraínumenn voru beðnir um að búa sig undir það versta.

Spjótin beinast að Rússum vegna árásarinnar.

Sjá einnig: Tölvuþrjótar komu ógnandi skilaboðum fyrir í umfangsmikilli netárás

TASS fréttaveitan, sem er í eigu rússneska ríkisins, hafði eftir Sergei Lavrov, utanríkisráðherra Rússlands, í dag að Rússar væru vel færir um að tryggja eigið öryggi. Þeir myndu ekki bíða endalaust eftir loforðum vesturveldanna svokölluðu.

Hann sakaði NATO um að reyna að koma fram vilja sínum yfir önnur ríki.

Margir leikir á borði Rússa

Hernaðarsérfræðingar sem Reuters fréttaveitan ræddi við segja þann herafla sem Rússar hafa flutt að landamærum Úkraínu bjóða upp á marga möguleika. Innrás gæti mögulega snúist um Donbass-héraði, þar sem áðurnefndir aðskilnaðarsinnar ráða lögum og ríkjum með stuðningi Rússa og þar sem Bandaríkjamenn segja Rússa mögulega ætla að falsa tilefni til innrásar.

Möguleg innrás gæti einnig snúist um að stækka yfirráðasvæði Rússa við Asov-haf og tengja Krímskaga, sem Rússar innlimuðu af Úkraínu árið 2014, við Rússland með beinum hætti.

Einn sérfræðingur sagði Rússa geta gert innrás frá Krímskaga og upp með Dnieper-á. Þannig gætu Rússar tekið stórt landsvæði af Úkraínu og myndað náttúrlegan varnargarð gegn gagnárás.

Slík innrás gæti hafist með stórskotaliði, eldflaugum á loftárásum á hersveitir Úkraínu, samhliða því að rússneskar sérsveitir reyndu að ná tökum á brúm yfir ánna.

Bandaríkjamenn hafa gefið út að Rússar gætu notað um 175 þúsund hermenn til innrásarinnar í allt að hundrað herdeildum. Fimmtíu eru þegar til staðar við landamæri Úkraínu og á Krímskaga.