Varaforsetinn útdeildi seðlum í klefanum

Eins og fram hefur komið á Vísi þá ákvað Brunswijk, sem er varaforseti Súrínam og eigandi Inter Moengotapoe, að tefla sjálfum sér fram í leik gegn Olimpia frá Hondúras á þriðjudaginn. Leikurinn var í næststerkustu alþjóðlegu keppni Concacaf, svipaðri Evrópudeildinni.

Brunswijk þraukaði fram í seinni hálfleik, með fyrirliðabandið, áður en honum var skipt af velli á 54. mínútu. Þá var staðan orðin 4-0 fyrir Olimpia sem vann að lokum 6-0 sigur.

Aganefnd Concacaf er nú með til skoðunar myndband sem birtist á samfélagsmiðlum eftir leikinn. Þar sést Brunswijk, sem á sínum tíma var dæmdur fyrir fíkniefnasmygl í Hollandi, útdeila seðlum í búningsklefa andstæðinganna, Olimpia, eftir leikinn. Myndbandið má sjá hér að neðan.

Concacaf lýsir yfir þungum áhyggjum af efni myndbandsins sem veki upp spurningar um heilindi þeirra sem á því sjást. „Málið er inni á borði aganefndar Concacaf sem mun hefja formlega rannsókn og greint verður frá niðurstöðum hennar þegar þær liggja fyrir,“ segir í yfirlýsingu sambandsins.

Leikmenn og aðstoðarþjálfari Olimpia, sem CNN ræddi við, vildu ekki setja út á þátttöku hins sextuga Brunswijk í leiknum og sögðu andstæðingum sínum einfaldlega frjálst að tefla fram því liði sem þeir vildu. Enginn af fulltrúum Inter Moengotapoe hefur svarað fyrirspurnum miðilsins um málið.